Kadalasang Katanungan

Archive of Our Own (Ating Sariling Sisidlan)

Bakit kailangan ng isa pang artsibo?

Ang aming unang layunin ay lumikha ng software package na bago, libre, at malayang magagamit, upang ang mga tagahanga ay makapangalaga ng kanilang sariling mga artsibo na ganap at matibay, na kayang sumuporta ng kahit ilang daang-libong kuwento, at mayroong kapasidad para sa mga social network, upang ang mga tagahanga ay makapag-ugnayan sa isa’t isa sa pamamagitan ng kanilang likha.

Ang aming ikalawang layunin ay gamitin ang software na ito upang makapagbigay ng sentral na tagapangalagang espasyo na di-pangkalakal at di-kumikinabang para sa mga fanfic at iba pang ibahing katha, kung saan ito ay nakasilong sa ilalim ng pagtataguyod ng OTW (Organisasyon para sa Ibahing Katha), at kung saan maaring samantalahin ang trabaho ng OTW na itaguyod ang legalidad at halagang-panlipunan ng mga kathang ito. Hindi katulad ng ibang artsibo, ang Archive of Our Own – AO3 (Ating Sariling Sisidlan) ay hindi pinapatakbo ng mga indibiduwal na ang interes sa fandom ay pabago-bago, kundi ng isang di-kumikinabang na organisasyon na pinamamahalaan ng isang inihilal at nagbabagong lupon ng mga nakatalagang tagahanga. Inaasahan naming ito’y makadudulot sa kapamalagian at katatagan kumpara sa ibang artsibo o serbisyo.

Sino ang kumikita mula sa AO3? Kailangan bang magbayad ng mga gumagamit?

Walang sinuman, kabilang ang OTW (Organisasyon para sa Ibahing Katha) bilang isang organisasyon, ay kumikita mula sa Archive of Our Own – AO3 (Ating Sariling Sisidlan) o mula sa mga nilalaman nito; sa katunayan, ang kabaligtaran nito ang totoo dahil ang OTW ang nagbabayad upang pangalagaan ang AO3. Wala kaming ipinapakitang patalastas. Sa halip, kami ay gumagawa ng mga pampubliko at mala-radyong kampanya upang humingi ng suporta mula sa mga tagagamit. Kailanman ay walang donasyon na ipipilit sa mga tagagamit ng AO3 o sa mga kaakibat na kagamitan nito.

Bakit ang tagal gawin ng software ng artsibo?

Hindi simple ang proseso ng pagbuo sa isang artsibo na tulad ng hinahangad ng OTW (Organisasyon para sa Ibahing Katha). Hindi kami nagtataguyod ng isang artsibo gamit ang software na mayroon na, kundi kami ay gumagawa ng bago at malayang-magagamit na software na pang-artsibo na idinisenyo ayon sa mga pangangailangan ng mga tagahanga, upang ito ay madaling panatilihin at gamitin muli, na kaya ring pangalagaan ang posibleng milyun-milyong kuwento mula sa ilang daang-libong mga sabay-sabay na tagagamit.

Ang trabahong ito ay ginagawa ng isang grupo ng mga boluntaryo, kabilang ang grupo ng mga boluntaryong baguhang natututong magsulat at magpanatili ng code, upang makatulong sa pagbuo ng komunidad ng coders mula sa mga tagahanga. Ito ay grupo ng mga tao na makatutulong sa pagpapanatili ng software na pang-artsibo sa hinaharap. Sa ibang salita, kami ay hindi lamang nagtataguyod ng software na pang-artsibo, kundi pati na rin ng mga taong patuloy na gagawa nito.

Kami ay naglaan din ng panahon upang bumuo ng mga patakarang komprehensibo at angkop sa mga tagahanga na umaayon sa payo ng maraming kapwa-tagahanga; maaaring makita ang naging resulta sa aming Mga Palatuntunan sa Archive of Our Own – AO3 (Ating Sariling Sisidlan).

May katagalan ang pagtaguyod ng mga ito, ngunit lubos din kaming naniniwalang magiging sulit naman ang kalalabasan. Maaaring sundan ang pagtutuloy ng paggawa sa aming mga blog at newsletter para sa AO3. Upang makasali, magsabi lamang sa mga Boluntaryo at Pangangalap.

Sinusubukan bang palitan ng OTW ang lahat ng ibang artsibo?

Hindi. Sa katunayan, nais naming gamitin ng iba pang mga tagahanga ang aming software na pang-artsibo, na magiging malayang gamitin at baguhin, para makalikha sila ng sarili nilang mga artsibo.

Sa Archive of Our Own – AO3 (Ating Sariling Sisidlan), nais naming lumikha ng artsibong multi-fandom na may mahusay na kapasidad at mga patakarang pwedeng ayusin at ilapat, na tatagal at angkop para sa mga tagahanga. Nais naming maging depositong-aklatan ng mga fandom, isang espasyo kung saan maaaring i-back up ng mga tao ang kanilang mga katha o proyekto, na may pirmihang mga kawing. Hindi namin nais maging eksklusibong espasyo kung saan dito lamang ipapaskil ng mga tao ang kanilang mga gawa. Hindi ito dito lang/sa iba, kundi mas maraming paglalagyan, mas masaya!

Paano makakakuha ng account sa AO3?

Ang Archive of Our Own – AO3 (Ating Sariling Sisidlan) ay naging open beta noong Nobyembre 2009. Para gumawa ng account, kailangan mo ng paanyaya. Kami ay gumagamit ng sistema ng mga bilyete ng paanyaya upang lumaki ang AO3 sa isang kontroladong paraan. Kailangang unti-unting magdagdag ng mga bagong tagagamit upang hindi lumobo ang dami ng ating mga account nang higit sa kakayahan ng aming hardware, bandwidth, tulong at suporta. Nakatutulong ito sa amin na tiyaking lahat ng gumagamit ng AO3 ay makakukuha ng pinakamaginhawang karanasan. Kapag natanggap mo na ang email ng paanyaya, magtungo sa kawing na nakasulat sa email upang makapunta sa pahina upang lumikha ng account. Kung ikaw ay binigyan ng kawang ng paanyaya isang dati nang tagagamit, mapupuntahan mo ang tamang pahina sa pagsunod sa kawing na iyon.

Ako ay nagpapatakbo ng artsibo na nais kong ilipat/i-back up sa AO3. Ano ang dapat kong gawin?

Makipag-ugnayan lamang sa Open Doors para ma-access ang iyong importer tool. Huwag mag-atubiling ipaalam sa amin agad kung mayroon kang mga espesyal na pangangailangan — halimbawa, kung nais mong kami ang pumalit sa pagpapanatili ng iyong lumang domain, o kung ang iyong artsibo ay naglalaman ng mga kathang multimedia.

Donations and Membership

Paano ako makapagbibigay ng donasyon sa OTW?

Pabigay ng donasyon, pumunta lamang sa aming form para sa mga donasyon.

Salamat sa iyong pagtangkilik! Kung mayroon kang mga katanungan o isyu sa pagkumpleto ng iyong donasyon, maaari lamang na makipag-ugnayan sa Komite ng Pagsulong at Kaaniban.

Maaari ba akong makapagbigay ng donasyon na naka-tseke? Kanino ko ito dapat ipadala?

Oo, kung ikaw ay nakatira sa Estados Unidos. Sa kasamaang-palad, hindi kami maaaring tumanggap ng mga tseke mula sa labas ng Estados Unidos sa kasalukuyan. Punan lamang ang aming form para sa mga donasyon, piliin ang opsyon na nagsasabing “I will send payment by check” (Ipapadala ko ang bayad gamit ang tseke), at ipadala ang iyong tseke sa:

Organization for Transformative Works, Inc.
228 Park Ave S #18156
New York, New York 10003-150
USA

Ang mga donasyong naka-tseke ay maaaring abutin ng tatlong linggo bago mai-deposito. Kung ikaw ay may mga katanungan, maaari lamang na makipag-ugnayan sa Komite ng Pagsulong at Kaaniban.

Maaari ba akong magbigay ng donasyon sa pamamagitan ng salapi?

Oo, kung ikaw ay nagbigay ng donasyon na nasa US dollars. Subalit tatanggapin lamang ang salapi bilang isang donasyong hindi para sa pagka-miyembro. Kung ito ay para sa pagiging miyembro, kinakailangan namin ng isang account sa bangko o ng isang credit card upang mapatunayan namin na ikaw ay isang tunay na tao at isang indibidwal lamang para sa halalan.

Upang makapagbigay-donasyon, maaaring ipadala ang salapi sa:

Organization for Transformative Works, Inc.
228 Park Ave S #18156
New York, New York 10003-150
USA

Kung ikaw ay may mga katanungan ukol dito, maaari lamang na makipag-ugnayan sa Komite ng Pagsulong at Kaaniban.

Maaari ba akong magbigay ng donasyon na hindi gamit ang dolyar ng Estados Unidos?

Oo, maaari kang makagawa ng online na donasyon gamit ang aming form para sa mga donasyon. (Mangyari lamang na pakitandaan na, para sa salapi at tseke, hindi kami maaaring tumanggap ng donasyong hindi dolyar ng Estados Unidos). Kapag ikaw ay nagbigay ng donasyon gamit ang aming online form, ipatutukoy sa iyo ang halaga ng donasyon sa dolyar ng Estados Unidos; pagkatapos nito ay makukumpleto mo na ang iyong pagbayad sa pamamagitan ng credit card o Paypal.

Maaaring makipag-ugnayan sa Komite ng Pagsulong at Kaaniban o sa PayPal support para sa karagdagang tulong.

Maaari bang i-awas sa buwis ang mga donasyon sa OTW? Kung oo, ano ang iyong EIN?

Oo, sa Estados Unidos. Rehistrado ang OTW (Organisasyon para sa Ibahing Katha) bilang isang 501(c)(3) nonprofit organization, at lahat ng donasyon sa amin ay maaaring i-awas sa buwis. Ang aming EIN sa US ay 38-3765024; isasama rin ito sa iyong resibo sa donasyon para sa iyong mga talaan.

Pakitandaan lamang na sa labas ng Estados Unidos, may posibilidad na maaaring mai-awas sa buwis o hindi ang iyong donasyon. Sumangguni sa isang tagapayo ukol sa buwis upang malaman kung ang isang regalo sa isang US 501(c)(3) nonprofit organization ay sapat na upang magkaroon ng pagbabawas sa iyong buwis ayon sa iyong lokal na batas.

Maaari lamang na makipag-ugnayan sa Komite ng Pagsulong at Kaaniban kung ikaw ay may karagdagang katanungan tungkol dito.

Bakit hinihingi ang aking pangalan at tirahan sa form para sa mga donasyon? Maaari ba akong magbigay ng donasyon nang hindi nagpapakilala?

Para sa mga donasyon para sa pagiging miyembro, kinakailangan naming ikawing ang bawat donasyon sa isang tiyak na indibiduwal para sa mga kadahilanang ligal, upang maiwasan ang kaganapan na kung saan ang isang tao ay magbibigay ng donasyon ng maraming beses upang magkaroon ng karapatang magkaroon ng maraming boto. (Basahin ang Bakit kinakailangan ng bayad para sa pagiging miyembro upang mabigyan ang isang tao ng karapatang bumoto sa halalan ng OTW? sa ilalim para sa karagdagang impormasyon.)

Ang iyong impormasyon ay ligtas sa amin, at kami ay may paninindigan sa seguridad ng datos. Hindi namin kailanman ikakabit ang iyong pagkakakilanlang legal at fannish. Maaaring basahin ang aming Pampribadong Patakaran para sa karagdagang detalye.

Kung nais mong magbigay ng donasyon nang hindi ibinibigay ang iyong tirahan, maaari kang magbigay ng isang donasyong hindi pang-miyembro sa pamamagitan ng salapi o money order (kung ikaw ay nakatira sa Estados Unidos). Maaaring sumangguni sa Maaari ba akong magbigay ng donasyon sa pamamagitan ng salapi? sa itaas.

Maaaring makipag-ugnayan sa Komite ng Pagsulong at Kaaniban kung ikaw ay may karagdagang katanungan.

Ano ang pagkakaiba ng donasyong pang-miyembro at ng donasyong hindi pang-miyembro?

Ang donasyong pang-miyembro ay itinatalaga ka bilang isang miyembro ng OTW (Organisasyon para sa Ibahing Katha): ikaw ay maaaring bumoto sa aming taunang halalan para sa Lupon ng Pangangasiwa. Para sa karagdagang impormasyon ukol sa proseso ng aming halalan, maaaring bisitahin ang website ng Halalan ng OTW o makipag-ugnayan sa Komite ng Halalan.

Bakit kinakailangan ng kabayarang pang-miyembro upang mabigyan ang isang tao ng karapatang bumoto sa halalan ng OTW?

Tulad ng maraming organisasyong di-pangkalakal, ang OTW (Organisasyon para sa Ibahing Katha) ay gumagamit ng kabayarang pang-miyembro bilang isang tapat at madaling siyasating pangangailangan upang masigurado na ang bawat miyembro ay isang indibiduwal. Kung hindi, ang isang tao ay maaaring makagawa ng maraming account upang magkaroon ng maraming boto sa halalan.

Ang mga kabayarang ito rin ay napupunta sa pagtangkilik sa OTW—upang mabayaran ang aming mga gastusin sa operasyon para sa organisasyon at sa lahat ng aming proyekto upang hindi namin kailanganin ang mga patalastas o humingi ng bayad mula sa aming mga tagagamit. Intensyon naming panatilihing mababa ang aming pinakamaliit na donasyon upang masiguradong hindi ito magiging hadlang sa pagsali ng sinumang pinahahalagahan ang organisasyon, ngunit aming hinihiling na sana ay makapagbigay ng mas malaking halaga ang karamihan sa mga miyembro kung kakayanin!

Makabibili ba ako ng pagkamiyembro para iregalo sa iba?

Upang masiguro na ang lahat ng miyembrong bumuboto sa OTW (Organisasyon para sa Ibahing Katha) ay mga tunay na tao, at makapagsagawa ng patas na halalan, hindi kami maaaring pumayag sa pagreregalo ng pagiging miyembro. Ineengganyo ang mga tagatangkilik sa pagbibigay ng donasyon para sa iba gamit ang aming form, ngunit ang mga donasyon na ito ay hindi magbibigay ng karapatang bumoto o ng pagkamiyembro.

Ang pagiging miyembro ba ay makapagbibigay sa akin ng imbitasyon para sa AO3?

Hindi, ang pagiging miyembro ng OTW (Organisasyon Para sa Ibahing Katha) at ng Archive of Our Own – AO3 (Ating Sariling Sisidlan) ay walang kinalaman sa isa’t isa. Upang magkaroon ng AO3 account, maaari lamang sumali sa pila para sa paanyaya. Ang pagbibigay sa OTW (Organisasyon para sa Ibahing Katha) ay tutulungan kaming tuluy-tuloy na mabayaran ang gastos sa pagpapatakbo ng AO3 kaya aming inaaanyayahan ang iyong pagtangkilik, ngunit kami ay naninindigan sa paghahandog ng AO3 bilang isang libreng serbisyo para sa lahat. Walang koneksyon sa pagitan ng donasyong indibidwal at sa mga account sa AO3.

Kung ikaw ay may katanungan ukol sa imbitasyon para sa AO3, maaaring makipag-ugnayan sa Suporta Para sa AO3.

Maikakabit ba ang aking pagiging miyembro ng OTW sa aking account sa AO3?

Hindi, ang kaaniban sa OTW (Organisasyon para sa Ibahing Katha) at sa Archive of Our Own – AO3 (Aming Sariling Sisidlan) ay walang anumang koneksyon. Ang OTW ay madiing sumusuporta sa karapatan ng mga tagahangang paghiwalayin ang kanilang pagkakakilanlang fannish at hindi fannish. Hindi namin kailanpanman ikakabit ang dalawa, at ang mga database na naglalaman sa kanila ay magkaiba. Ang aming storage at paggamit ng iyong datos ay ayon sa aming Pampribadong Patakaran.

Hanggang kailan tumatagal ang pagiging miyembro? Paano ko malalaman kung maaari ba akong bumoto?

Ang iyong kaaniban ay tumatagal ng isang taon mula sa iyong pinakahuling donasyon. Kung ang iyong donasyon ay natanggap mahigit sa isang buwan bago ang isang halalan, ikaw ay maaaring bumoto sa eleksyon na iyon at ikaw ay makatatanggap ng notipikasyon sa email na naglalaman ng karagdagang impormasyon ukol sa mga botong ito.

Kung hindi ka sigurado kung kailan ang huli mong donasyon, maaaring makipag-ugnayan sa Komite ng Pagsulong at Kaaniban.

Saan napupunta ang aking donasyon? Paano ginagastos ng OTW ang pera nito?

Sinusuportahan ng iyong donasyon ang operasyon at mga proyekto ng OTW (Organisasyon Para sa Ibahing Katha). Kami ay isang organisasyon na binubuo ng puro boluntaryo, kaya ang bulto ng aming gastusin ay napupunta sa pagpapanatili ng aming mga proyekto.

Para sa karagdagang kaalaman ukol sa aming mga kasalukuyang gastusin at sa aming prospektibong badyet, maaaring bisitahin ang:

Kung may iba ka pang katanungan, maaaring makipag-ugnayan sa Komite ng Pagsulong at Kaaniban.

Maaari ba akong magbigay ng donasyon na minarkahan para sa isang tiyak na proyekto o gastusin ng OTW?

Sa kasalukuyan, walang paraan upang markahan ang mga donasyon para sa iisang proyekto o gastusin ng OTW (Organisasyon para sa Ibahing Katha). Maraming mga gastusin na hindi itinalaga para sa tiyak na proyekto at may kinalaman sa organisasyon bilang kabuuuan: halimbawa, ang software na gamit ng aming mga boluntaryo upang magdaos ng mga pulong at magplano; ang server na nagho-host ng aming panloob na dokumentasyon at nilalaman ng Archive of Our Own – AO3 (Aming Sariling Sisidlan); at ang firewall na pumuprotekta sa Fanlore, AO3, at sa aming internal storage. Ang mga donasyon ay napupunta sa pananatili ng lahat ng ito at sa iba pang proyekto ng OTW.

Paano ako makakakuha ng buod ng lahat ng aking donasyon sa piskal na taong ito?
Ano ang regalo para sa pasasalamat? Paano ako makakakuha ng isa?

Ang mga regalo para sa pasasalamat ay opsyonal na kagamitang maaari mong piliing makuha kung ikaw ay nagbigay ng higit pa sa US$50. Ang listahan ng mga regalong maaaring makuha ay regular na nagbabago. Maaaring bisitahin ang aming form para sa mga donasyon upang malaman ang kasalukuyang pagpipilian.

Ako ay gumagawa ng umuulit na donasyon. Maaaring ba akong makakuha ng regalo para sa pasasalamat kung ang kabuuan ng aking mga donasyon ay umabot na sa ganoong halaga?

Oo! Maaari lamang na makipag-ugnayan sa Komite ng Pag-unlad at Kaaniban, ipagbigay-alam mo sa amin kung anong regalo ang iyong gusto, at kapag ikaw ang umabot sa halagang iyon, ipadadala namin ang regalo sa iyo.

Paano ako makakapagtakda ng isang umuulit na donasyon (magbigay ng US$__ kada __ buwan)? Maaari bang tumungo ang umuulit na donasyon sa pagiging miyembro?

Bisitahin ang aming form para sa Umuulit na Donasyon upang makagawa ng umuulit na donasyon.

Oo, kung iyong pinili ang opsyon para sa kaaniban, ang iyong umuulit na donasyon ay maaaring tumungo sa pagiging miyembro.

Paano ko mababago ang halaga ng umuulit na donasyon na aking tinakda, o ang credit card na aking ginamit?

Hindi maaaring baguhin ang halaga ng isang umuulit na donasyon. Sa halip, kinakailangan mong itigil ang donasyon at magtakda ng panibago. Maaaring makipag-ugnayan sa Komite ng Pagsulong at Kaaniban upang ikaw ay matulungan sa prosesong ito.

Upang mabago ang credit card na iyong ginamit sa donasyon, kinakailangan mong baguhin ang mga detalye ng iyong transaksyon sa Paypal. Maaari lamang sumangguni sa PayPal help para sa karagdagang impormasyon ukol rito, o makipag-ugnayan sa PayPal support para matulungan.

Kung ako ay nagbigay ng donasyon sa ngalan ang isang tao, makakakuha ba sila ng notipikasyon?

Hindi kami nakikipag-ugnayan sa mga honoree sa kahit anong paraan. Ang pagbibigay ng email address para sa seksyong ‘sa ngalan ni’ ay opsyonal at hindi nakagagawa ng kahit anong notipikasyon.

Hindi ako makapagbibigay ng donasyon ngayon, ngunit gusto kong suportahan ang inyong trabaho. Maaari ba akong magboluntaryo para sa OTW?

Lahat ng mga posisyon na kasalukuyang bukas ay nakalista sa pahina ng Pagboboluntaryo. Kung hindi nakalista ang isang posisyong gusto mo, maaaring balikan ang pahina sa ibang pagkakataon at bantayan ang mga panibagong pagbubukas ng mga posisyon. Palagi kaming nagpapaskil ng impormasyon ukol sa mga bagong posisyon sa mga labasan ng balita ng OTW (Organisasyon Para sa Ibahing Katha).

Organisasyon para sa Ibahing Katha

Ano ang OTW (Organisasyon para sa Ibahing Katha)?

Ang OTW (Organisasyong para sa Ibahing Katha) ay isang organisasyong di-pangkalakal na itinatag ng mga tagahanga para magsilbi sa interes ng mga tagahanga, sa pamamagitan ng pagbibigay ng akses at pangangalaga ng kasaysayan ng mga hangang-katha sa iba’t iba nitong anyo.

Bakit itinatag ang OTW?

Ang OTW (Organisasyon para sa Ibahing Katha) ay itinatag para makapagpundar patungo sa kinabukasan kung saan lahat ng mga hangang-katha ay kinikilala bilang ligal at transpormatibo, at tinatanggap bilang isang lehitimong malikhaing gawain.

Ang aming misyon ay maging maagap at makabago sa pangangalaga at pagtatanggol ng aming gawain mula sa komersyal na pananamantala at ligal na hamon, at ingatan ang ekonomiyang paghanga, mga birtud, at paraan ng pamumuhay sa pamamagitan ng pagtatanggol at pangangalaga ng mga kapwa tagahanga, ang aming gawa, komentaryo, kasaysayan, at pagkakakilanlan, habang nagbibigay sa lahat ng mga tagahanga ng pinakamalawak na maaring akses sa gawaing fannish.

Anong ibig niyong sabihin sa ibahing gawa?

Ang ibahing katha ay kumukuha mula sa isang bagay na mayroon na at binabago ito patungo sa isang bagay na mayroong panibagong layunin, katalusan, o paraan ng pagpapahayag.

Kabilang ngunit hindi limitado sa mga ibahing katha ang fanfiction, katha tungkol sa mga tunay na tao, hangang-vid, at hangang-sining. Ang OTW (Organisasyon para sa Ibahing Katha) ay interesado sa lahat ng uri ng ibahing katha, ngunit ang aming prayoridad ay ang suportahan at ipagtanggol ang lahat ng uri ng katha na nakalagay sa aming archive, at ang mga tagahanga na lumikha sa kanila.

Bakit ito ang pananalitang pinili?

Ang terminong transformative (ibahin) ay partikular na pinili upang bigyang halaga ang isa sa mga pinakamahalagang ligal na depensa para sa lahat ng uri ng hangang-katha sa pangalan ng organisasyon: na ang mga ito ay binago mula sa orihinal na pinanggalingang materyal.

Ang paggamit na transpormatibo ay paggamit na, ayon sa lenggwahe ng Mataas na Hukuman ng Estados Unidos, “nagdadagdag ng bago, na may karagdagang layunin o ibang katangian, kahulugan, o mensahe.” ang kwento mula sa pananaw ni Voldemort ay transpormatibo, gayon din ang isang kwento tungkol sa isang sikat na artista na naglalarawan ng mga kasalukuyang palagay sa katanyagan at sa sekswalidad.

Sinuri din ng mga korte ang “karapatan sa publisidad” na hamon laban sa mga malikhaing likha gamit ang transformative use test mula sa batas ng karapatang-ari, kaya sakop din nito ang isa sa mga mahalagang ligal na hamon na kinakaharap ng mga katha tungkol sa mga tunay na tao. Dahil isa sa mga pangunahing layunin namin ay ang ipagtanggol ang karapatang mamalagi ng mga hangang-katha, mahalaga sa organisasyon ang pagkakaroon ng pangunahing depensa para sa kanila na nakalagay sa aming pangalan.

Kinakatawan ba ng OTW ang lahat ng fandom?

Ang OTW (Organisasyon para sa Ibahing Katha) ay hindi nagsasalita para sa lahat ng fandom, ni hindi hinahangad man na mangyari iyon: malaki ang fandom, paano mo man ito gustong tukuyin. Sa ngayon, nais ng OTW na magbigay ng isang kapaki-pakinabang, nahahanap, maaasahan at matatag na tahanan para sa lahat ng fanfiction, ano man ang kaurian nito at kinabibilangang fandom, at sa pangmatagalang hinaharap naman ay makapagpalawak sa ibang uri ng mga hangang-katha. Para magawa iyon, sinusubukan naming gumawa ng isang matibay at maipagtatanggol na imprastraktura—iyan ang OTW.

Malugod naming tinatanggap lahat ng fandom sa mga proyekto ng OTW, kabilang na ang Archive of Our Own — AO3 (Ating Sariling Sisidlan), ang periyodiko ng Transformative Works and Cultures — TWC (Ibahing Katha at Kultura), at ang Fanlore wiki. Lahat kami ay nakikibahagi na pakiharapin ang lahat ng ibahing fannish na katha sa karaniwang mga ligal na isyu. Nais naming tulungan ang mga kapwa-tagahanga na labanan ang mga walang kabuluhan na liham ng cease and desist, o humanap ng ligal na tulong kung mayroon silang magandang kaso at gusto nilang ituloy ito.

Sinusubukan naming humanap ng mga kakampi at gumawa ng mga koneksyon bago pa man magkaroon ng kaguluhan, habang ipinapaunawa sa mundo bakit hindi kailangan magkaroon ng kaguluhan, dahil ang mga fan ay mga suking mamimili.

Bakit nakapokus sa mga babaeng tagahanga ang mga birtud at mga pagpapahayag ng misyon?

Ang pinagmulan ng OTW (Organisasyon para sa Ibahing Katha) ay komunidad ng mga tagahanga at deka-dekadang kasaysayan na binuo ng halos puro kababaihan. Ngayon, dahil sa internet at makabagong teknoholohiya, ang komunidad at mga interes ng komunidad na ito ay mabilis na lumalago sa iba’t ibang direksyon at bumabagtas sa iba pang mga komunidad ng tagahanga na may iba’t iba ring kasaysayan. Kami ay puno ng tuwa at pag-asa sa paraan ng paglago ng aming komunidad at sa pakikihalubilo nito sa ibang sari-saring klase ng kulturang remix, at tanggap namin ang sinumang nais gawin ang aming ginagawa. Gayon din, mahalaga pa ring kilalanin na ang partikular na malikhaing komunidad na ito ay isang lugar na itinayo at hinubog na matindi ng panlasa ng mga kababaihan, dahil iyon ay isang pambihira at kamangha-manghang bagay batay sa kasaysayan.

Pinapahalagahan ng OTW ang lahat ng mga tagahanga at ang mga ambag ng lahat ng mga tagahanga anuman ang kasarian. Habang lumago ang OTW palabas sa kasanayang nanggagaling sa ibahing hangang-gawa sa kultura ng mga kababaihan, partikular din naming pinapahalagahan ang kasaysayan ng paglahok ng mga kababaihan, at ang mga kaugalian ng fandom na hinubog ng mga gawain ng kababaihan.

Maraming mga samahan, kabilang na ang Comic Book Legal Defense Fund, ang Academy of Machinima Arts & Sciences, at ang Electronic Frontier Foundation, ang nakapokus sa mga isyu at interes na may kaugnayan sa fandom; ang OTW ay partikular na nakapokus sa mga isyu na may kaugnayan sa ibahing katha na fanfiction, fanvid at hangang-sining.

Sino ang nasa likod ng OTW?

Ang OTW (Organisasyon para sa Ibahing Katha) ay isang organisasyong itinatag ng mga tagahanga, para sa mga tagahanga. Ito ay pinapatakbo ng isang Lupon ng Pangangasiwa. Tignan ang Tungkol sa Amin para sa karagdagang impormasyon.

Sino ang namimili sa Lupon ng Pangangasiwa?

Ang 2007-2008 na Lupon ay hinirang upang agarang mapatakbo ang OTW (Organisasyon para sa Ibahing Katha). Lahat na ng mga sumunod na lupon ay inihalal ng mga kasapi ng OTW. Tungkulin ng Lupon ang mag-organisa ng mga komite, gumawa ng mga huling pagpapasiya, gumawa ng pinansyal na tala, pangasiwaan ang pagsunod, at iba pa.

Ang mga miyembro ng Lupon ay inaasahang magsilbi ng mga tatlong taong termino. Isang-katlo ng Lupon ang ihinahalal bawat taon. Ihinahalal ang Lupon mula sa mga kasapi na may mabuting katayuan at nakapagsilbi ng hindi bababa sa isang taong termino sa isang komite. Bawat kasapi ng OTW ay nakakakuha ng isang boto sa halalan, kahit pa magkano ang kanilang naiambag. Kung ikaw ay interesado sa pagtakbo sa pagka-Lupon, mangyaring makipag-ugnayan sa mga kawani ng Halalan. Para sa karagdagang impormasyon sa proseso ng aming halalan, mangyaring bumisita sa Website ng Halalan ng OTW.

Paano pinipili ang mga komite?

Ang Lupon ang nagpapasiya kung aling mga komite ang bubuuin, at saka magtatalaga ng mga tagapangulo sa mga komiteng ito at mga kasaping pinili ng mga tagapangulo. Ang pangunahing mga kasapi ay pinipili mula sa mga taong unang tumugon sa unang pampublikong pagtawag na “Handang Magsilbi” para sa mga boluntaryo.

Paano ako magboboluntaryo upang tumulong? Kailangan ko bang maging kasapi para magboluntaryo?

Tinatanggap namin ang lahat ng mga nais tumulong! May daan dang boluntaryong nakikilahok sa mga proyekto ng OTW (Organisasyon para sa Ibahing Katha)—ang malaking nakararami sa kanila ay nagboluntaryo bilang tugon sa aming pampublikong paskil para sa pangangalap. Ang mga boluntaryo ng OTW ay nagmumula sa iba’t ibang lahi, kasarian, kultura, sekswal na pagkakakilanlan, at kakayahan. Hindi namimili ng boluntaryo ang OTW batay sa mga nakasaad na iyan, at pinapahalagahan namin ang pagkakaiba-iba ng aming mga kawani. Mangyaring makipag-ugnayan sa aming Komite ng Pagboboluntaryo kung nais magboluntaryo.

Paano ako maaring maging kasapi ng komite?

Lagi kaming naghahanap ng mga magagaling na kasapi ng komite! Ang mga komite ay itinatalaga taon-taon, na may paminsan na pagpapalit sa gitna ng taon kung kinakailangan. Ang mga tagapangulo ay kadalasang binibigyan ng kalayaan na magtalaga ng kanilang komite, at likas silang malimit kumuha ng mga nagboluntaryo sa kanilang komite o may ibang (fannish o pangtunay na buhay) karanasang naaangkop. Kung ikaw ay interesadong magsilbi sa partikular na komite, mangyari lamang ipaalam sa Komite ng Pagboboluntaryo.

Sino ang maaaring gumamit ng mga serbisyo ng OTW at magboluntaryo?

Tinatanggap namin ang lahat ng gustong makipagtalakayan tungkol sa mga pinagbubuhatan (mga palabas, mga banda, mga manlalaro, anime, atbp.) at fandom; tanggap namin lahat ng manlilikha o tagatangkilik ng fanfiction, vid, hangang-sining, at iba pang uri ng ibahing katha.

Ang mga tao bang nagpapatakbo ng OTW ay kasangkot sa fandom?

Kami ay fan muna, at iyan ang dahilan bakit kami naglalaan ng aming oras para sa organisasyon.

Ang OTW (Organisasyon ng Ibahing Katha) ay pinapatakbo ng mga parehong tao na tumulong upang itatag ang: The Automatic Archive software, Yuletide, Buffistas.org, Polyamorous Recs, Pornish Pixies, ang Exwood Archive, Vividcon, con.txt, DSX, DSA, The Snarry Reader, ang “Snape After Deathly Hallows” fest, ang SGA Big Bang, ang Sugar Quill, ang DS Seekrit Santa, ang Supernatural Wiki, ang Foresmutters Project, Sweet Charity, pirate_hunters, ang Wolverine & Rogue Fanfiction Archive, ang X-Men Movieverse Fan Fiction archive, ang Audiofic Archive—bukod sa iba pang mga malalaking proyektong fannish—at higit pang mga kuwento, mga vid, at fannish na sining kaysa maari mong mabilang.

Maaring mahanap ang mga talambuhay ng mga kasalukuyang Lupon ng Pangangasiwa, kabilang na ang kanilang mga kaugnayang fannish dito sa website.

Volunteering

Ano ang pagkakaiba ng ‘boluntaryo’ sa ‘kawani’?

Ang OTW (Organisasyon para sa Ibahing Katha) ay isang organisasyong binubuo ng pawang mga boluntaryo. Ibig sabihin, kusang-loob ang panunungkulan nilang lahat. Gayunpaman, nagkakaiba ang antas ng aming mga responsibilidad at pakikilahok, kaya pinagkakaiba ang mga katawagang boluntaryo sa kawani.

Kadalasan, ang boluntaryo ay nanunungkulan bilang isang bahagi ng grupo (hal., mga tag wrangler, tester, tagasalin), o ng isang gawaing grupo na may tiyak na gawaing kailangang tapusin. Karaniwang hindi kinakailangang sumali ng mga boluntaryong pang-grupo sa mga pagpupulong, ngunit maaaring obligahin ang pagdalo ng mga boluntaryo ng mga gawaing grupo. Ang mga boluntaryo ay hindi nakaboboto sa kanilang mga komite, maliban na lamang kung nanunungkulan din sila bilang kawani.

Ang kawani ay nanunungkulan sa isang komite ng OTW, inaasahang dumalo sa mga pagpupulong, at sumali sa mga trabaho at proyekto nito. Kadalasan, mas mahabang panahon ang kailangang ilaan ng mga kawani kaysa sa mga boluntaryo. Dagdag pa rito, pagkatapos manungkulan ng hindi bababa sa siyam na buwan, maaaring tumakbo ang isang kawani para maging miyembro ng Lupon ng Pangangasiwa.

Maaari ba akong mag-boluntaryo para sa higit sa isang tungkulin?

Pwede. Maraming kawani sa OTW (Organisasyon para sa Ibahing Katha) ang naglalaan ng panahon para sa iba’t ibang tungkulin.

Gayunpaman, hinihiling naming pag-isipan muna nang mabuti ang oras na kailangang ilaan sa bawat tungkulin na nais mong kunin, pati na rin ang panahon na nais mong ibigay sa organisasyon. Habang maganda para sa OTW at sa aming mga boluntaryo na manungkulan ang isang tao sa iba’t ibang tungkulin, nais pa rin naming siguraduhin na hindi sila masosobrahan sa responsibilidad. Lahat ng mga bagong detalye ng mga posisyon ay nagsasaad ng natatantyang oras na kailangang ilaan para sa isang tungkulin, upang magbigay-gabay sa mga inaasahan tungkol dito. Iminumungkahi rin na kumunsulta ang mga boluntaryo sa tagapangulo ng kanilang komite tungkol sa pagkuha ng karagdagang tungkulin.

Mayroon bang kailangang edad na maabot bago makapagboluntaryo?

Upang makasunod sa Children’s Online Privacy Protection Act (COPPA) sa ilalim ng batas ng Estados Unidos, tumatanggap lamang kami ng mga aplikasyon mula sa mga indibiduwal na 13 taong gulang pataas. May mga natatanging tungkulin at komiteng nangangailangan ng mga tiyak na kakayahan at siyang na nagtatakda ng edad ng pagsapi sa 18 taon para sa mga gustong makilahok.

Kinakailangan bang nasa tiyak na lugar ako para makapagboluntaryo?

Lahat ng mga boluntaryo ng OTW (Organisasyon para sa Ibahing Katha) ay nagtatrabaho online, kaya hindi kailangang ika’y nasa tiyak na lugar. Basta’t mayroon kang koneksyon sa Internet, ika’y nasa tamang lugar (at makakatrabaho mo ang iba’t ibang tao mula sa iba’t ibang panig ng mundo).

Karamihan ng impormasyon sa inyong mga website ay nasa wikang Ingles. Maaari pa rin ba akong magboluntaryo kahit na hindi Ingles ang katutubong wika ko?

Siyempre! Malugod kaming tumatanggap ng mga boluntaryo mula sa iba’t ibang panig ng mundo at mula sa lahat ng karanasan.

Bilang isang organisasyong nanunungkulan para sa pandaigdigang komunidad, mayroon kaming mga tagagamit at miyembro na ang katutubong wika ay hindi Ingles, at marami sa aming mga komite at proyekto ang nakikinabang sa mga boluntaryong bihasa sa mahigit isang lenggwahe. Ingles ang karaniwang wika ng buong organisasyon, kaya kakailanganin mong makapagtrabaho sa wikang ito (pero hindi kailangang dalubhasa ka rito). Kung mayroon kang espesipikong konsiderasyon para sa pagpasok sa isang tungkulin, ipaalam sa Mga Boluntaryo at Pangangalap, at tutulungan ka nilang makipag-usap sa tagapangulo ng komite.

Kailangan ko ba ng mga espesyal na software o kagamitan para makapagboluntaryo?

Kailangang mayroon kang matatag na koneksyon sa Internet, dahil gumagamit kami ng mga web-based software at ng email para makipag-usap. May mga tungkuling kakailanganing gumamit ng iba’t ibang website o software. Ang mga kagamitang ito ay libre o binabayaran ng OTW (Organisasyon para sa Ibahing Katha).

Mayroon bang mga konsiderasyon ukol sa aksesibilidad ng mga may kapansanan kapag nagboboluntaryo?

Ang OTW (Organisasyon para sa Ibahing Katha) ay gumagamit ng ilang kagamitan online, tulad ng Basecamp at Campfire, na maaaring hindi gumana nang maayos kapag sinamahan ng mga teknolohiya para sa may mga kapansanan. Karamihan sa aming mga gawain ay may kinalaman sa teksto, at may mga tungkuling kailangang gawin nang mabilisan at nangangailangan ng madaliang komunikasyon gamit ang aming text-based online chat.

Kung mayroon kang mga espesipikong katanungan, huwag mag-atubiling ipaalam sa amin at sisikapin naming makatulong sa pinakamabuting paraan.

Interesado ako sa isang tungkuling kasalukuyang hindi nakalista. Maaari pa rin ba akong magpasa ng aplikasyon para dito?

Sa kasalukuyan, tumatanggap lamang kami ng mga aplikasyon para sa mga nakalistang tungkulin. Bahagi ng aming proseso ay mangalap lamang para sa mga tungkuling pinaghandaang tumanggap at magturo ng mga bagong boluntaryo. Gayunpaman, hinihimok naming subaybayan ninyo ang pahinang pamboluntaryo ng OTW
(Organisasyon para sa Ibahing Katha) News kung sakaling ilista ang ninanais niyong tungkulin. Kung mayroon pa kayong espesipikong katanungan ukol sa mga tungkulin, maaring makipag-ugnayan sa Mga Boluntaryo at Pangangalap.

Wala ako ng mga kasanayan o karanasan na kinakailangan ng mga tungkuling nakalista. Maaari pa rin ba akong magpasa ng aplikasyon?

Habang malugod kaming tumatanggap ng mga boluntaryong nais sumabak sa panibagong karanasan, mayroon pa rin kaming mga tungkulin na nangangailangan ng tiyak na kasanayan at karanasan. Ang aming kakayahang tumanggap ng mga baguhan para sa isang tungkulin ay batay din sa dami ng mga bihasang boluntaryong may pahanon para turuan ang mga baguhan. Ang mga kinakailangang karanasan at bilang ng oras na ilalaan para sa bawat posisyon ay nakasulat sa detalye ng mga ito.

Hinihimok naming tuluyan niyong subaybayan ang pahinang pamboluntaryo para sa mga bukas na tungkulin na tugma sa inyong mga kakayahan. Kung mayroong mga katanungan ukol sa pangangailangan ng isang tungkulin, huwag magatubiling ipaalam sa Mga Boluntaryo at Pangangalap.

Kailangan ko bang gamitin ang pangalang kasalukuyan kong ginagamit sa fandom o sa AO3 kung nais kong magboluntaryo? Kailangan ko bang gamitin ang pangalan ko sa AO3 upang makapagboluntaryo bilang isang Tag Wrangler?

Maaaring gamitin ang kahit alinmang pangalan kapag ika’y nagboluntaryo. May ibang boluntaryo na gustong iugnay ang kanilang gawain sa kanilang pagkakakilanlan sa fandom, at ang iba naman gustong gamitin ang kanilang ligal na pangalan, lalo na kung gusto nilang isama ang kanilang pagboboluntaryo sa kanilang resume o CV. Maaari mong gawin ang alinman dito o gumawa ng panibagong pangalan.

Kung ika’y natanggap na magboluntaryo bilang isang Tag Wrangler, ngunit ayaw mong iugnay ang iyong gawain sa tag wrangling sa iyong kasalukuyang account, pwede kang bigyan ng iyong mga tagapangulo ng imbitasyon para gumawa ng panibagong account para lamang sa tag wrangling. Kung nais mong gamitin ang kasalukuyan mong account, hindi kinakailangang tugma ito sa iyong pangalan para sa OTW (Organisasyon para sa Ibahing Katha), ngunit alalahanin na maaring maiugnay ang pangalan mo sa OTW sa pangalan mo sa Archive of Our Own – AO3 (Ating Sariling Sisidlan) sa kurso ng iyong panunungkulan sa tag wrangling.

Paalala: May ilang tungkulin kung saan kinakailangan mong gamitin ang iyong ligal na pangalan, sapagka’t sila’y nakikisalamuha sa mga organisasyon sa labas. Palagi naman itong babanggitin sa detalye ng posisyon o sa mismong aplikasyon.

Anong mangyayari pagkatapos kong ipasa ang form para sa aplikasyon?

Depende ito sa uri ng tungkuling inaaplayan mo. Pagkatapos pindutin ang submit (ipasa), ipakikita sa pahina ang mga susunod na hakbang, at padadalhan ka ng awtomatikong mensahe ng pagpapatunay.

Para sa mga tungkuling maraming bukas na posisyon (halimbawa ay ang isang grupo ng boluntaryo, tulad ng pagsasalin o ng tag wrangling): Ipadadala ng Mga Boluntaryo at Pangangalap ang mga aplikasyon sa mga tagapangulo ng bawat komite at/o sa mga lider ng mga grupo ng boluntaryo. Makikipanayam ang tagapangulo sa mga potensyal na aplikante upang matiyak kung bagay sila sa tungkulin. Ipaaalam namin sa lahat ang kinalabasan ng kanilang mga aplikasyon sa madaling panahon.

Para sa mga tungkuling naghahanap lamang ng tiyak na bilang ng tao (halimbawa, isang kawani): Iingatan ng Mga Boluntaryo at Pangangalap ang lahat ng aplikasyon at ipadadala ang mga ito sa tamang tagapangulo pagkatapos ng panahon ng pangangalap. Makikipanayam ang tagapangulo sa mga potensyal na aplikante upang mahanap ang taong pinakatugma sa mga bukas na tungkulin. Ipaaalam namin sa lahat ang kinalabasan ng kanilang mga aplikasyon sa madaling panahon.

Nagpasa ako ng aplikasyon pero wala akong natanggap na sagot. Ano ang dapat kong gawin?

Dapat lahat ng aplikasyon ay makatanggap ng awtomatikong sagot na nagpapaliwanag sa mga susunod na hakbang sa proseso. Upang siguraduhing naipadala ito, siguraduhing aprobado ng iyong account ang mga email mula sa *@transformativeworks.org.

Kung hindi mo natanggap ang awtomatikong sagot sa loob ng 48 oras, pakitingnan ang iyong spam filter at padalhan ng e-mail ang volunteers@transformativeworks.org – kasama ang posisyong iyong inaplayan at ang pangalang ginamit sa aplikasyon.

Babayaran ba ako para sa pagboboluntaryo?

Hindi, walang sinuman sa OTW (Organisasyon para sa Ibahing Katha) ang tumatanggap ng kabayaran.

Mayroon akong mga katanungan tungkol sa pagboboluntaryo na hindi nasagutan dito.

Makipag-ugnayan sa Mga Boluntaryo at Pangangalap gamit ang form para sa pakikipag-ugnayan at malugod naming sasagutin ang iyong mga katanungan, kadalasan sa loob ng isang linggo. (Kung magpapadala ng katanungan na hindi nasa wikang Ingles, maaaring madagdagan ng isa pang linggo bago kami makasagot.)